ما بيختلف ليبانيزيان إنّو لبنان أحلى بلد بالعالم بس بنفس الوقت ما بيتفقو ليش. بالوقت يلّي ناس بيطلّعو عالحضارة وناس ما بيشوفو إلّا الطبيعة خلوني قول إنّو موضوع جمال لبنان أعم وأشمل. خلونا نشوف “لماذا”.
خلّونا نبلّش بأهم نقطة. لبنان أحلى بلد بالعالم لأنّو بنص ساعة بس فيك تكون عمتسبح وتصير بتعمل سكي (تتفشكل عالتلجات يعني). كيف لكان. يعني إذا افترضنا إنّو الواحد طلع من البحر جاهز بتياب السكي والسيارة محماية وناطرة وطار عالطريق والله نجاه من شي خمسين حادث ووصل عالأرز أو فاريا بنص ساعة منفاجؤو إنّو بؤوسي (تارا يعني) ما في تلج. دابو من شي تلات شهور ونزلو بالنهر وصبو بالبحر وانت وعمتتسبح يا حبيبي كنت أصلا بنفس الوقت عمتعمل سكي. يعني حتى انو إشاعة النص ساعة غلط. بلبنان بنفس الوقت بتسبح وبتعمل سكي يا حبيب ألبي انت.
لبنان كمان أحلى بلد بالعالم بتقصه المعتدل وفصوله الاربع ويلي أيّ رزنومة بالوطن بتدلك على أول يوم بالخريف أوآخر يوم بالشتوية. كيف لكان. ما من فجر التاريخ والتاريخ ما تغيّر بلبنان. والرزنومة بتنطبع بنفس المطبعة. بس منغير الألوان. وكل سنة كل سنة منقنع حالنا إنّو السنة الطقس غير عن كل سنة وهالصيفية طلع شوب وهالشتوية ما شتت كتير والدني ما عادت متل أوّل والله يرحم جد جدك كان يحكيلنا عن الدني اللي ممكن تشتي بآب بس مستحيل وائل كفوري يبطل يحبها. اليوم صارت بتشتّي بآب بس اللي جدك ما بيعرفو اذا وائل بطل يحبها ولّا لأ.
في ناس بيشدّو على موضوع إنّو لبنان أحلى بلد بالعالم لأن طبيعتو غير شكل. والخَضار بكل محل والشّجر معبّى الجبال كلها. جبل جبل. وأيّ مشوار بالسيارة بأي شارع بالبلد ما بتشوف إلّا الجمال ومناظر بتمجّد الخالق. وفجأة بتفيق من هيدى المنام الرومنسي وبتعرف إنّو الخَضار ما عاد موجود إلّا بزريعة ستّي اللّي حاططها عالبلكون. والشجر حاطيلو إنارة خاصة بمداخل البنايات (مع إنّو منطَفّيها معظم الوقت لنوفّر كهرباء). والمشوار بالسيارة بيبرهنلك إنّو انت بأحلى بلد بالعالم لأنو بتشوف مع بعض الغني والفقير والمعتّر والوزير. لُك لأ. الوزير ما بيمشي بالشارع بس صورو اللي متلاية الشارع هي اللي مزينة الطريق. و أكيد بتستوقفك مناظر نظافة الطريق اللي عن جد لوحدها أكبر دليل انو ليضل في حدى عايش أكيد في خالق.
ولبنان أكيد أحلى بلد بالعالم بهواه النقي يللي مش بس بيساعد مرضى الربو وبيوصفوه لكل مين صدرو تعبان بس كمان بيتغنّو بألوانو اللي بتضل كل السنة لون واحد. رمادي. ما نحن شو عملنا. نحن كتير فنانين. كتّرنا دخان السيارات وزدنا دخان المصانع ميشان نعمل غيمة صناعية فوق البلد حتى الشمس ما توصل قوية عالأرض ويضل الطقس حلو. اي كيف لكان. البلد ما بيصير أحسن الا اذا كلنا سوى اشتغلنا على الموضوع وكنا إيد واحدة لتكبر الغيمة وتصير أسمك والشمس صارت يا دوب بتساعد نعمل برونزاج نحن وعم نعمل سكي بالبحر.
وبالأخير لبنان أحلى بلد بالعالم لأنو لمّا بتتركو بتِجلي عينيك عالطريق من البيت للمطار واذا بتدقّق بعيون اللّي راكبين جمبك عالطيارة بتشوف انهم كلهم شطفو عيونهم ومن كترة النظافة صارت حمراء. وكلّن كلّن بقلبهم وبصوت واحد عمبغنو مع فيروز بحبك يا لبنان يا وطني بحبك وبيزيدو وبيقولو راجعين نكحل عيوننا بزبالتك ونشم ريحة دخانك وسياراتك وننطر الشتي بآب لأنك شو ما كنت وشو ما صار بتضلك أحلى بلد بالعالم.
