طيّب طيّب فهمت خلص حئشرحلك شو هي المانشية. سيداتي سادتي، المانشية حديقة عامة بنص طرابلس جنب برج ساعة التل عمرها أكتر من ثمانين سنة. وللمعلومة ما أظن في شخصان بطرابلس ممكن يتفقو على اسمها. في ناس بيسمّوها الممشية وبيعتبرو انو الها علاقة بالمشي. وناس بيسمّوها المنشية على أساس انه في منشية بمصر. شخصيا أنا بعرف انو اسمها المانشية (وهيدي مش حرف الألف بعد الميم هيدا حرف ما حدى بيعرفو الّا الطرابلسي الأصيل صاير هيك شي بين الألف والياء) على الأغلب انّو الاسم جاية من ثقافة انكليزية قديمة بمعنى “المان” الذي مشى.

المانشية شغلة عظيمة وفخر لكل طرابلسي وطرابلسية. فيها نافورة مي وفيها شجرة قديمة قدم التاريخ اسمها شجرة التنابل لأنو كل يلّي عاطلين عن العمل بيعدو تحتها لتقيهم من الشمس وحرارة غلاء الأسعار الّي ما بيرحم.

وبعد هالعمر كلّو البلدية بتبلّط بالمانشية. سكّرو الأبواب وصراحة ما عرفت وين راحو الشباب يلّي عطول جوّا. لك في مصور كان بيقى مقضّى كل وقته جوّا بيصوّر الحبّيبة صور تذكارية. على أساس انّو بعد عمر طويل: بتتذكري يا حياتي يوم كنّا بالمانشية.

الوصول الى المانشية سهل وبسيط وفيك تسأل أي بني آدم بالشارع بيدلّك لأنو المانشية معلم سياحي عظيم. اي كيف لكن شو مفكرين انتو؟

المهم انو ما كتير تهتمو بالطريق اللي الزفت فيه بيزفّت بلد لأن بمجرد توصلو عالمانشية حتنسو الطرقات والبنايات وتعب المشوار وتتمنو تقضو بقية عمركم بالمانشية. وعلى رأي الّي قال نيّالو الّي عندو مرقد عنزة بالمانشية.

وبعدين نحن شو بيفهّمنا بالسياحة. شو بدّهن السياح غير كم شتلة خضراء يتصوروا جمبها.هلّأ بشرفكن مش مهم انّو السائح الأوروبي يشوف خضار بلدنا. والسائح العربي بدل ما كان يمشي على تراب المانشية يلّي ممكن يذكرو برمل الصحارى يصير يمشي على بلاط دخيل ألله ما أجملو. السائح الأفريقي بيتأمل بجمال المي بالنافورة. بيضل بس السائح الياباني صراحة ما بعرف شو ممكن نعملّو شي يشدّو بهالمانشية.

ولك تحفة تحفة صارت هالمانشية. بدّي أعرف ليش باقي البلد ما فيها مانشيات. وأنا برأيي المتواضع انّو أهالي مدينة بيروت لازم يرفعو شعارات المطالبة بتغيير اسم حديقة الصنائع الى مانشية الصنائع وانشاء فرع لبلديّة طرابلس بجانب المانشية الجديدة بركي بعد شي ثمانين سنة البلدية بتبلّطها وبتصير فخر السياحة الوطنيّة.