طلع خبر انّو الحكومة صارت قريبة وانّو بكرى العيد. والعالم فرحت وهيصت ونزلت ترقص بالطرقات وصارو يعبطو بعض بالشوارع وخود يا بوس. وطلعت أسماء الممثلين وخلص الفيلم. لك اي فيلم وفيلم رخيص كمان معمول على طريقة رامبو. ما ميشان شي بس لأن ما في بطل أد رامبو ولأن العبط عالطريق ما بيصير الا بالأفلام الأمريكية. بدّي افهم أنا ليه ما في بلبنان هيصة ودبكة وعبط بالشوارع. أيوا لأن ما في حكومة. مفهوم!

انّو طيّب الخبر صح ولّا غلط بدنا نعرف. ولّا طولي بالك لقلّك. إذا اعتبرنا انّو الخبر صح ولّا غلط. شو اللي بيتغيّر. أنا ويلّي متلي عايشين وبشتغلو برّى شو بيصير معهم. إذا بتتشكّل الحكومة المهاجرين اللبنانيين كلّهم رحيرجعو. وكلّن حيلاقو شغل بأرض الوطن. والشغل أكتر من العالم. والوظيفة اللّي ما بتعجبهم بيتركوها فورا لأنّو من مبارح الوظيفة التانية ناطرتهم.

طيّب وانت إي انت شو حتفرق معك ولّا شو حيتغيّر عليك. انّو حتصير تنكة البنزين بنص الألف ولّا حيصير البلد أخضر ونبطّل تصحّر. لك شو دخل الحكومة بالتصحّر. ما بعرف بس لازم كتّر نأ.

طيّب مش انت. المواطن الفقير المعدم اللّي حامل هم فلافل بكرى وخبزات بعد بكرى شو منقلّو. منقلّو ما تخاف يا حبيبي. بكرى بتتشكّل الحكومة والدني بتصير ببلاش. ببلاش الّا شوي. يعني لتشتري اللحمة الحكومة حتعطيك اللحمات وحتعطيك فوقن مصاري بدل تعبك بأكلها. والمصاري بعدد العضّات. يعني كل ما أكلت على مهلك أكثر ولقمتك كانت أصغر بتصير بتاخد مصاري أكتر.

يعني شي بيجنّن. والله العظيم. هلّأ ميشان ما حدى يفهمني غلط الحكومة ضرورة ووجود حكومة قادرة انّو تغيّر وتحسّن بالبلد حلم كل لبناني ولبنانية. بس الواقع طول عمرو غير هيك. وطول عمرنا منتشاءل يوم ومنتفاءم يوم. وطول عمرو البلد هيك. وأنا وأنت والفقير لا فيلمنا حيخلص ولا حنشوف دبكة وعبط بالشوارع الّا بالسينما.