من زمان أنا وصغير كان في صبي ييجي من الأحراش العب أنا وياه وكان حمار. مع كامل احترامي لشادي بس الصبي بغنيتي كان حمار. مش حمار المسبة الطفولية المعروفة بس حمار هيدى اللي بيمشي على أربع إجرين وإلو دينتين كبار.

المهم. بيوم من الأيام ولعت الدني. الناس قتلو الناس وعلقت علقة ما بتفهم. والحمار صاحبي اكتأب. لما سألتو قلّي هي بلد لأ مش بلد ولا قرطة عالم مجموعين. والله كان صاحب حكمة قوية أو كان متأثّر بأبو الزوز. صراحة ما بعرف.

المهم. الحمار صاحبي طلعت براسو و راسو راس حمار انّو هالبلد مش إلو. و ركض عأقرب سفارة وقدّم اوراقو وهاجر لهونيك. وضاع الحمار. ضاع مش لأنو ما حفظ الطرقات ولا لأنّو ما تعرّف على حدى بس ضاع لأن أخباره انقطعت فترة طويلة ونسي أصحاب الطفولة اللي الحمار اعتبرهم حمير اللي بقيو بهيك بلد.

المهم. بعد فترة طويلة سمعت أخباره. هونيك، محل ما هاجر الحمار صاحبي، الحمار عاش حياته. بيمشي بالشارع رافع راسو. حاسس حالو أهم واحد بالدني. محترم. عارف شو إلو و شو عليه. بيوصل لحقّو بلا خناق. بلا سم بدن. وأهم شي انه بيروح و بييجي مش خايف من شي مزهرية توقع على راسو تقتله أو شي جورة بالشارع تفشكلو وتكسر اجرو. ما بيشوف السلاح الّا بالصور وما بيتخيّل انه في ناس ممكن ترتكب جرائم و ما تتحاسب.

اللي خبّرني أخباره قلّي طلع ذكي هالحمار. يمكن بدينيه اللي طوال سمع اللي ما حدى غيرو سمعو و فهم اللي نحن رافضين نعترف فيه.

المهم. اللي عرفته كمان انّو الحمار رشّح حالو على مجلس ممثلي الهونيكيين (سكان ومواطني دولة هونيك). مجلس طويل عريض. ما بينجح فيه الّا اللي بيشتغل لعمار بلد متل هونيك وراحة وأمان واستقرار المواطنين الهونيكيين. مجلس ما حدى بيحاسب التاني الّا على عمله. ورغم انّه حمار الّا انو القانون بيسمحلو يترشّح بدون ما يكون محسوب على فلان ولا ماشي وراء علّان. حتى عرفت انّه نجح بالانتخابات وصار شغلة عظيمة. لك طلع بيفهم. لو ما هاجر كان بقي كل عمره حمار ويمكن جدّي كان علّقلو خرزة زرقاء وركّبلو راديو وشوفاج ليدفى أيام البرد.

المهم. الحمار صار بيطلع عالتلفزيون وبيحكي رأيه وما بيخاف. بدولة متل هونيك السياسة ما فيها تبعيات ولا أنا صح والباقيين ماني شايفهن. لك حتّى الحمار بيقول اللي شايفو وقلبو قوي. ببلد مثل هونيك الحمار بيحكي بثقة. بخطاباته بطل. بيلقي خطابو ومتطمّن. متأكّد انّه لا حدى حيعايرو ويسبّو ويقلّو اسكت يا حمار. ولا حدى حيوقف و يجرّب يضربو. ولا حدى من مجلس ممثّلي هونيك حيتهمو بالعمالة لدولة الكلاب.