البلوغز اللبنانية ما في مثلها بكل العالم. كيف لكان ما نحن يونيك كتير. هيدا موضوع منرجعلو بعدين. يونيك لدرجة انو بطلنا نعرف نحكي عربي أو انو يعني بعدو من الطريق يابا نحن شعب مثقف. كيف لكن الليبانيزيين كلن أبضايات واليكم الدليل القاطع.
بيروت بتعمل بلوغ من The Other Lebanon. وينو هيدا لهاجر عليه
دعايات الطريق اللي برضو بتبرهن انو نحن شعب مثقف بتتاخد by shooting. أيييي وجعتني
وينك This is Beirut وينك سيل فو بلا تعا
ميس فرح بتعلّم انكليزي يمكن لكل العالم
لك حتى بلوغ بلدي ما في شي بلدي الا سعرو لي عالكرتونة. ضبلّي عشر حبّات بليز
مصطفى لي ممكن يطلع جاري بطرابلس مثلي بيكتب من برّى
كود لبنان 961 بيرد و يقول Hi كيفك Ça Va
بروفيل بالفرنسي و بكتب بالانكليزي و فهام يا معلّم. Chanty a une License maitrisé en Psychologie Industrielle. هسسسس هلأ بطلع مجنون
وشوربة الراس ما أطيبك قولكن هو أطبي ولّا الطعمات ال virtual من بيروت. بدنا ندوء
مايا وسارين بيرسمو ليبانيزية بس كلن عايشين ب لندن أو ممكن نيو يورك. المعنى بقلب الشاعر
ماكسيم رفع علم لبنان بالعالي. اللغة صارت انترناشونال أو انتناسيونال مش مهم
بيروت بتضوي و بتطفي. دخلك جاية عندكن ولا إشتراك
من الشارع للكل. أكيد للكل
بابا غنوج والزيتونة وجهان لعملة واحدة. جوعتونا
جمالك يا بيروت والله الجمال حلو. وبعدين؟
جو عندو علبة وتاركها مفتوحة
جمعناهن كلن كلن بمحل واحد. Aggregator أهلا وسهلا
أكيد كلّن أحلى عالم وأكيد بعد في كتير غيرن بيحاولوا يخلو كل العالم تعرف انو بحبك يا لبنان يا وطني.
شو رأيكن بالشعب العنيد والمثقف. اذا بدكن كمان دلونا على غيرن أهلا وسهلا بكل الليبانيزيين.
